Eskerrik asko Orio! Eskerrik asko Euskal Herria! Eskerrik asko Orioko Herri Ikastolari laguntzen aritu zineten boluntario guztioi!, hori dio 7916. klikmetroak. Orioko Herri Ikastolak egindako metroa da, Arraunetxearen babesa jaso duena.
Helburua bete dute, hasiera batean muga ibilbideari bira bat ematea baitzen. 5.632 metroak aspaldi geratu ziren atzean eta, azken egunetan, izugarrizko klik pila egin zituzten euskalzaleek. Zirkuituari bira bat ematearen erronka gainditu dute.
Metro bakoitzeko babesle bat dago, metroa ordainduko duena. Bisitariek egindako metro bakoitzeko babesleek dirua jarriko dute Kilometroak festaren alde. Kopurua ezta makala, 7.916 klik.